गोदावरीमा जारी नेकपा (एमाले)को दोस्रो विधान महाधिवेशनमा नेपाल ट्रेड यूनियन महासंघ – जिफन्ट आवद्ध संगठन इम्प्रेशन नेपालले आफ्नो दरिलो उपस्थिति जनाएको छ।
महाधिवेशनको पहिलो दिनदेखि नै सक्रिय भई, प्रतिनिधिहरूलाई सूचना र प्रविधिजन्य सहयोग उपलब्ध गराउँदै आएको यस संगठनले पार्टीभित्रको प्रेस तथा सूचना क्षेत्रलाई सुदृढ बनाउन निरन्तर योगदान दिँदै आएको छ। नेकपा (एमाले)को आठौँ महाधिवेशनदेखि प्रेससम्बन्धी जिम्मेवारी सम्हाल्दै आएको इम्प्रेशन नेपालले नवौँ महाधिवेशन पश्चात अझ आधुनिक प्रविधि प्रयोग गरेर सूचना व्यवस्थापन र प्रचार–प्रसारमा महत्वपूर्ण भूमिका निर्वाह गर्दै आएको छ।
यस पटकको विधान महाधिवेशनमा त संगठनले सूचना तथा प्रविधि डेस्क नै स्थापना गरी सहभागी प्रतिनिधिहरूलाई सहज र छिटो सूचना प्रवाह, आवश्यक सहजीकरण तथा प्रविधिजन्य सहयोग पुर्याइरहेको छ। साथमा एमाले को एप र साइबर सुरक्षा को जानकारीमुलक भिड़ियो बनाई प्रदर्शन समेत गरीएको इम्प्रेशनले जनाएको छ l
इम्प्रेशनका महासचिव सुरज अधिकारीका अनुसार, “हाम्रो उद्देश्य महाधिवेशनमा उपस्थित प्रत्येक प्रतिनिधिलाई अद्यावधिक जानकारी उपलब्ध गराउने मात्र होइन, संगठनको प्रविधिप्रति उत्तरदायी र आधुनिक भूमिका प्रमाणित गर्ने पनि हो। यसअघि पनि हामीले विभिन्न महाधिवेशनहरूमा सक्रिय सहभागिता जनाएका थियौँ, तर यस पटक प्रविधियुक्त कार्यशैलीले हाम्रो उपस्थितिलाई अझ प्रभावकारी बनाएको छ।”
उनले थपे, “इम्प्रेशन नेपालले विगतदेखि नै प्रेस तथा प्रचारसम्बन्धी कामलाई प्राथमिकताका साथ अगाडि बढाउँदै आएको छ। आजको युगमा प्रविधि प्रयोग नगरी सूचना तथा सञ्चार प्रभावकारी बनाउन सकिन्न। त्यसैले हामीले प्रविधिलाई अंगालेका छौँ र यसैलाई आधार बनाएर आगामी दिनमा अझ प्रभावकारी योगदान दिने छौँ।”
इम्प्रेशन नेपालको यस्तो सक्रियताले एमालेको विधान महाधिवेशनलाई व्यवस्थित र प्रभावकारी बनाउन उल्लेख्य सहयोग पुगेको आयोजकले जनाएका छन्।